Ба воситаи шабакаи интернетӣ маводе рўйи чоп омадааст, ки гўё яке аз қумандонони Кумитаи амнияти миллии Тоҷикистон- генерал-майор Хуршед Изатулло санаи 05 ноябри соли 2018 ба воситаи силоҳи оташфишон сўйи аҳолӣ тир холӣ намудаасту дар натиҷа дут ан аз аҳолии осоиштаи шаҳри Хоруғи Вилояти Мухтори Кўҳистони Бадахшон ҷароҳат бардоштаанд.

Ин қазия то куҷо асоси воқеӣ дорад, мақомотҳои қудративу ҳарбии кишвар ҳаллу фасл менамоянд. Вале даъвои ин гурўҳи сокинони шаҳри Хоруғ он аст, ки дидбонгоҳҳои иловагие, ки имрўз дар шаҳри Хоруғ гузошта шудаанду тартиботи дохилишаҳриро назорат мебаранд, аз миён бардошта шаванд.

Чуноне огоҳ ҳастем, баъди сафари кории Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон ба Вилояти Мухтори Кўҳистони Бадахшон вазъи сиёсии ин минтақа чандон ором арзёбӣ нагардида буд. Аз ин рў, дар ВМКБ ситоди байниидоравӣ таъсис дода шуд, ки дар муддати як моҳ вазъро орому силоҳҳои ғайриқонунии дар дасти аҳолибударо ҷамъоварӣ намоянд, то дар ин минтақаи дурдасти мамлакат тинҷиву оромӣ ва сулҳу суботи ҳамешагӣ побарҷо бошад.

Чи тавре ки ба воситаи расонаҳои хабарӣ иттлоъ доданд, қисме аз нафарони силоҳҳои ғайриқонунидошта ихтиёран силоҳҳояшонро оварда ба мақомоти ҳифзи ҳуқуқ супориданд. Вале ин ҳанўз анҷоми кор нест. Нафарон ё гурўҳҳои силоҳдор ҳоло ҳам дар ВМКБ мавчуданд ва то силоҳи охирин ҷамъ карда нашавад, мо ин минтақаи кишварамонро орому осуда намеҳисобем. Гарчанде ки имрўз сокинони ин вилоят иброз медоранд, ки мо орому осудаем, дигар ба муҳофизон эҳтиёҷ надорем, аммо кормандони ситоди байни идоравӣ ва мақомоти қудратии дар вилоят ва шаҳри Хоруғ фаъолиятдошта худ хуб медонанд, ки кай фаъолияташонро қатъ намоянду дидбонгоҳҳои иловагиро аз байн бардоранд.