Моҳи ноябри соли ҷорӣ як теъдоди зиёди зиндониёни №3-и шаҳри Хуҷанд бо маслиҳати пешакӣ аз зиндон фирор намуда буданд. Оиди ин қазия дар расонаҳои хабарии шабакаҳои интернетӣ маводҳои зиёде нашр гардидаанд.

Чуноне ки дар яке аз маводҳои нашршуда иттилоъ дода мешавад, Вазири корҳои хориҷии Ҷумҳурии Тоҷикистон- Сироҷиддин Муҳиддин дар яке аз нишастҳои матбуотӣ дар ин бора посухҳо додааст. Ба иттилои Вазири корҳои хориҷии Ҷумҳурии Тоҷикистон аксарияти фирориёни зиндон пайравону эътиқодмандони Давлатии Исломӣ- террористону иштирокчиёни ҷангҳои Сурияву Ироқ  ва қисми камашон паҳнкунандагони маводи мухаддир мебошанд.

Сараввал мақомоти қудратии кишвар хостанд бо роҳи гуфтушунид ин қазияро ҳаллу фасл намоянд, вале натиҷае ҳосил нашуд. Пасон маҷбур шуданд, ки аз яроқ истифода баранд. Дигар чӣ кор ҳам мекарданд? Гунаҳгор гунаҳгор аст ва ў барои содир намудани бисёр корҳои ношоиста қодир аст. Мақомот барои пешгирӣ намудани дигар амалҳои барои ҷомеа ва шаҳрвандонаш хавфнок аз силоҳ истифода намуд, ки фикр мекунем сад дар сад дуруст аст.

Аввалаш ин ки, ҷинояткор худ дар назди Давлату миллат гунаҳгор асту бояд ҷуброни гуноҳ намояд. Дигар ин ки, агар ў нафари хатарноку зараровар намебуд, зиндонӣ намешуд. Сеюм ин ки, ин нафарон гуноҳ бар замми гуноҳ намудаву ислоҳнашаванда будани худро собит гардонидаанд. Чаҳорум ин ки, баъди фирор кардан ба дархосту хоҳиши кормандони ҳифзи ҳуқуқ итоат нанамуда, мехостанд ба дигар корҳои ҷиноии вазнин даст зананд, шояд нафарони зиёдеро зери фишору таъқиб ва ҳатто бикушанд. Маҳз ба ҳамин хотир мақомоти қудратии мамлакат аз силоҳи оташфишон истифода намуданд.

Дар хусуси теъдодои фирориёну кушташудагон низ фарзияҳои гуногун рўйи чоп оварда шудаанд, аммо Вазири  корҳои хориҷии Ҷумҳурии Тоҷикистон- Сироҷиддин Муҳиддин иттилоъ додааст, ки теъдоди ошўбгарони кушташуда 21 нафарро ташкил медиҳанд.