Оғози соли таҳсил дар донишгоҳ

Мувофиқи қарори мушовараи Вазорати маориф ва илми Ҷумҳурии Тоҷикистон  имрӯз 17-08-2020 Рӯзи дониш ва дарси сулҳ оғоз гардид.

Донишгоҳи давлатии омӯзгории Тоҷикистон ба номи Садриддин Айнӣ низ дар рӯзи аввали соли таҳсилӣ тамоми имкониятро барои донишҷӯён ва омӯзгорон омода намудааст. Аз даромадгоҳи асосии донишгоҳ сар карда тамоми даромадгоҳҳо бо навбатдорҳои доимӣ ва маводҳои антисептикӣ муҷаҳҳаз гардонида шудааст. Дар даромадгоҳҳои ҳама факултетҳои донишгоҳ низ аз тарафи омӯзгорон навбатдор таъйин карда шудааст. Ҳамчунин, навбатдорҳо бо ҳароратсанҷи фосилавӣ ва маводи антисептикӣ муҷаҳҳаз гардонида шудаанд. Бо таваҷҷуҳ ба ин масъала, ки яке аз роҳҳои асосии гузаштани бемории коронавирус риоя накардани фосилаи байни якдигар мебошад, дар синфхонаҳои донишгоҳ тамоми дарсҳо бо риояи фосилаи иҷтимоӣ ва гузоштани ниқоби тиббӣ гузашта истодааст. Бояд гуфт, ки донишҷӯёну омӯзгорон ва кормандони донишгоҳ  бо риояи ҳатмии тавсияҳои табибон амал намуда, соли нави таҳсилро бо рӯҳияи болидаву дили саршор аз меҳри Ватан оғоз  намуданд.