Имрӯз, 30-юми январи соли равон байни Донишгоҳи давлатии омӯзгории Тоҷикистон ба номи Садриддин Айнӣ ва Донишгоҳи давлатии Тирмиз (Ҷумҳурии Ӯзбекистон) ба таври маҷозӣ ёддошти тафоҳум ба имзо расонида шуд.

Ёддошти тафоҳум аз тарафи ректори Донишгоҳи давлатии омӯзгории Тоҷикистон ба номи Садриддин Айнӣ профессор Ибодуллозода Аҳлиддин ва ректори Донишгоҳи давлатии Тирмиз профессор Тошқулов Абдуқодир Ҳамидович дар шакли маҷозӣ ба имзо расонида шуд.

Ҷонибҳо зимни имзои ёддошти тафоҳум доир ба масъалаҳои дар созишномаи ҳамкорӣ дарҷгардида, ҷиҳати баргузор намудани конфронсҳои байналмилалии муштарак, ташкили курсҳои такмили ихтисос барои омӯзгорон, табодули донишҷӯён ва тавсеаи ҳамкориҳои минбаъда ризоият баён карданд.

Маврид ба зикр аст, ки Донишгоҳи давлатии омӯзгории Тоҷикистон ба номи Садриддин Айнӣ феълан ҳамкориҳои судмандро бо 110 муассисаҳои олӣ ва олии касбии ватаниву хориҷӣ дар самти илмиву таълимӣ ва мубодилавию фарҳангӣ ба роҳ монда, тасмим дорад, ки дар оянда ҳамкориро бо муассисаҳои бунуфузи дунё тавсеа бахшад.