ИҚДОМИ НАВБАТИИ МАЪМУРИЯТИ ДОНИШГОҲИ ОМӮЗГОРӢ

Субҳи 13 январи соли 2023 бо ташаббуси бевоситаи ректори Донишгоҳи давлатии омӯзгории Тоҷикистон ба номи Садриддин Айнӣ, муҳтарам Аҳлиддин Ибодуллозода ҷиҳати тоза кардани пиёдароҳҳо ва таваққуфгоҳҳои атрофи донишгоҳ ҳашари дастаҷамъона анҷом пазируфт. Мавриди зикр аст, ки ҳайати устодону кормандон ва донишҷӯёни донишгоҳи омӯзгории пойтахт дар бартараф намудани мушкилоти ҳаракати одамон ва васоити нақлиёт аз рӯзи нахустини боишоти барфи зиёд ташаббус зоҳир менамоянд.

МУЛОҚОТ БО ОМӮЗГОРОНИ СОҲИБЗАБОН

12-уми январи соли равон муовини ректор оид ба робитаҳои байналмилалии Донишгоҳи давлатии омӯзгории Тоҷикистон ба номи Садриддин Айнӣ Қурбонзода Рухшона бо омӯзгорони соҳибзабон, шаҳрвандони кишварҳои хориҷӣ, ки ба донишҷӯёни донишгоҳ дарс мегӯянд ва тариқи шартномаи дутарафа дар муассисаи мазкур фаъолият менамоянд, вохӯрӣ баргузор намуд. Дар ҷараёни вохӯрӣ масъалаҳои марбут ба раванди таълим, мушкилоти ҷойдошта дар ин самт ва будубоши онҳо дар Ҷумҳурии Тоҷикистон ва ҳамзамон нақшаи фаъолияти онҳо баррасӣ гардид.

ФАЪОЛИЯТИ КОМИССИЯИ БАРҚАРОРУ ИНТИҚОЛ ҲАМЕША ТАҲТИ НАЗОРАТ ҚАРОР ДОРАД

Имрӯз, 10-уми январи соли 2023 Наҳтулло Айнуллозода, муовини ректор оид ба корҳои таълимӣ ҷаласаи назоратӣ дар толори Шӯрои олимон баргузор намуд. Дар ҷаласаи мазкур сардори Раёсати таълим ва сармутахассисони ин бахш, муовинони декан оид ба корҳои таълимӣ ва методистону коргузорон ширкат намуданд. Муовини ректор оид ба корҳои таълимӣ ҷаласаро аз пурсиши рафти ҳуҷҷатгузории фаъолияти комиссияи интиқолу барқарор дар факултетҳо оғоз намуда, масъулинро барои саривақт омода ва пешниҳод намудани ҳуҷҷатҳои зарурӣ дастур дод.

ҚАБУЛИ ШАҲРВАНДОН ТИБҚИ ТАРТИБИ МУҚАРРАРӢ

Имрӯз, дар таърихи 10 январи соли 2023 дар асоси тартиби рӯзҳои қабул аз ҷониби ректори донишгоҳ Аҳлиддин Ибодуллозода ҷиҳати баррасии дархости муроҷиаткунандагон  рӯзи қабул анҷом пазируфт. Муроҷиати шаҳрвандон аз тарафи роҳбари Донишгоҳ дар доираи талаботи қонун баррасӣ гардида, вобаста ба моҳият талаботу хоҳиш аксар муроҷиаткунандагон  қонеъ карда шуд. Дар раванди қабули шаҳрвандон асосан  масъалаҳои интиқолу барқарори донишҷӯён  ва маблағи шартномаи таҳсил пешниҳод гардида буданд. Маврид ба зикр аст, ки ректори донишгоҳ дар доираи салоҳиятҳои хеш дархости муроҷиаткунандагонеро, ки 400 вожаи  серистеъмоли забонҳои русӣ ва англисиро бо иловаи ду ғазали муқарраршуда аз худ карда буданд, қонеъ намуда, бобати таҳлили дархостҳои мухталиф ба мутасаддиёни сохторҳои донишгоҳ вобаста ба моҳияти онҳо супориш ироа кард.

ҲИМОЯИ РИСОЛАИ НОМЗАДӢ ДАР СОҲАИ ФИЗИКА

Дар таърихи 9 январи соли равон дар Шӯрои диссертатсионии 6D.KOA-041 – и назди Донишгоҳи техникии Тоҷикистон ба номи академик Муҳаммадҷон Осимӣ омӯзгори кафедраи физикаи умумии факултети физикаи Донишгоҳи давлатии омӯзгории Тоҷикистон Мирзоева К. рисолаи худро дар мавзӯи “Таъсири нанозаррачаҳо бо эффекти “Хотираи шакл” доштаи андазаҳояшон гуногун ба тағйирёбии гармигузаронӣ ва зичии толоул ҳангоми гузариши фазавӣ” таҳти роҳбарии доктори илмҳои техникӣ, профессор Маҳмадалӣ Сафаров аз рӯи ихтисоси 01.04.14-Физикаи ҳарорат ва назарияи техникаи гармо барои дарёфти дараҷаи илмии номзади илмҳои техникӣ бомуваффақият ҳимоя намуд.

ҲИМОЯИ РИСОЛАИ ИЛМӢ

Дар Шӯрои диссертатсионии 6D.KOA-038 – и назди Донишгоҳи миллии Тоҷикистон дар таърихи 5 январи соли 2023 омӯзгори кафедраи ботаникаи факултети биологияи Донишгоҳи давлатии омӯзгории Тоҷикистон  Сафармади Мирзовалӣ рисолаи номзадии худро дар мавзӯи “Аломатҳои биоморфологии топинамбур (HELIANTHUS TUBEROSUS L.) дар шароити водиҳои Кӯлобу Ҳисор” зери роҳбарии доктори илмҳои биология Қурбоналӣ Партоев аз рӯи ихтисоси 03.02.01-Ботаника бомуваффақият ҳимоя намуд.

Раёсати донишгоҳ Сафармади Мирзовалиро ҷиҳати ҳимояи рисолаи номзади илм  табрику таҳният намуда, дар корҳои минбаъдаи ӯ комёбиҳои назаррасро таманно дорад.