ҶАЛАСА: ДАР ЛИТСЕЙИ ДОНИШГОҲИ ОМӮЗГОРӢ ТАЪЛИМ БО ЗАБОНИ РУСӢ ВА АНГЛИСӢ БА РОҲ МОНДА МЕШАВАД!

Имрӯз Аҳлиддин Ибодуллозода, ректори донишгоҳ, бо иштироки муовинони ректор, деканони факултетҳо, сардорони раёсат ва мудирони кафедраҳои умумидонишгоҳӣ ҷаласаи назоратӣ баргузор намуд.
Дар ҷаласа ректори донишгоҳ як қатор масъалаҳои муҳим, аз ҷумла омодасозии ҳуҷҷатҳои хатмкунандагони соли ҷорӣ барои имтиҳонҳои хатм, назорати ҷидии ҳозиршавии донишҷӯёни фосилавӣ ба дарсҳо, сабти дарсҳои видеоии омӯзгорон, ташкили шӯроҳо ва масъалаи таълим дар Литсейи Донишгоҳро бо забонҳои русиву англисӣ мавриди баррасӣ қарор дода, масъулинро ҷиҳати иҷрои саривақтии вазифаҳо хеш муваззаф намуд.

РИОЯИ НИЗОМИ МЕҲНАТ БАРОИ ҲАМА ҲАТМИСТ

Имрӯз, 15 марти соли 2023 таҳти раёсати муовини якум, муовини ректор оид ба корҳои таълимӣ Наҳтулло Айнуллозода бо иштироки муовинони ректор ва садорати факултетҳо ҷаласаи корӣ баргузор гардид. Дар ҷаласа масоили марбут ба интизоми меҳнат, сару либос ва омодагӣ ба таҷлили ҷашни Наврӯз мавриди баррасӣ қарор гирифтанд.
Дар рафти ҷаласа Наҳтулло Айнуллозода таъкид намуд, ки талаботи Кодекси меҳнати Ҷумҳурии Тоҷикистон ва Низомномаи донишгоҳ оид ба интизоми меҳнат аз тарафи кормандону устодони факултетҳо бояд риоя карда шавад ва дар ҳолати ошкор шудани вайронкунии талаботи низоми меҳнат аз ҷониби кормандону омӯзгорон нисбати онҳо чораҳои маъмурӣ татбиқ карда мешавад.

МАСЪАЛАҲОИ МУБРАМИ ЗАБОНШИНОСӢ, ТАРҶУМА ВА МЕТОДИКАИ ТАЪЛИМИ ЗАБОНҲОИ ХОРИҶӢ ДАР МАКОТИБИ ТАҲСИЛОТИ ОЛӢ

Дар таърихи 11 марти соли равон дар Донишгоҳи давлатии омӯзгории Тоҷикистон ба номи Садриддин Айнӣ бахшида ба ҷашни Наврӯзи байналмилалӣ, амалигардонии “Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон то соли 2030” ва 80 солагии профессор Парвонахон Ҷамшедов таҳти унвони “Масъалаҳои мубрами забоншиносӣ, тарҷума ва методикаи таълими забонҳои хориҷӣ дар макотиби таҳсилоти олӣ” конференсияи илмӣ-амалии байналмилалӣ баргузор гардид. Ҷаласаи ифтитоҳии конференсияро муовини ректор оид ба корҳои илмӣ, профессор Дониёр Сангинзод оғоз намуда, сухани ифтитоҳии ректори донишгоҳ, профессор Аҳлиддин Ибодуллозодаро ба самъи ҳозирин расонд, ки дар он аз ҷумла омадааст, ки  донистани забонҳои хориҷӣ роҳи моро барои расидан ба комёбиву муваффақиятҳо кушода месозад. Забондонӣ шарти асосии ҷаҳондонӣ ва ҷаҳонишавии шахс аст.

ҶАЛАСАИ НАВБАТИИ ШУРОИ ИЛМӢ - МЕТОДӢ

24 феврали соли 2023 ҷаласаи навбатии Шурои илмӣ-методӣ баргузор гардид. Ҷаласаро раиси шуро, муовини ректор оид ба корҳои илмии донишгоҳ, профессор Дониёр Сангинзод оғоз бахшида, аъзоёни шуроро бо рӯзномаи ҷаласа шинос намуд. Дар идома гузоришҳои сардори раёсати таълим Сулаймонов И. оиди истифодаи усулҳои фаъоли таълим ва татбиқи технологияи нав дар раванди таълим, сармутахассиси раёсати илм ва инноватсия Мансурова З. оиди вазъи корҳои таълимию методӣ, илмӣ ва сифати тайёр кардани мутахассисон дар кафедраҳои умумидонишгоҳӣ, сардори гурӯҳи корӣ Каримов Ш. оид ба вазъи ҳуҷҷатгузории Шурои  илмӣ-методии факултетҳо ва иҷрои қарорҳои Шурои илмӣ-методии донишгоҳ, сардори маркази хизматрасонии техникӣ ва коммуникатсионӣ Лутфуллои С. оид ба вазъи синфхонаҳои компютерӣ, шароити таъминот, дастрасии интернет ва истифодаи тахтаи электронӣ дар раванди таълим шунида шуданд.

ВОХӮРӢ БО ХАТМКУНАНДАГОН

24 феврали соли 2023 дар Донишгоҳи давлатии омӯзгории Тоҷикистон ба номи Садриддин Айнӣ бо хатмкунандагон  ҷиҳати таъмин намудани муассисаҳои таълимии шаҳри Душанбе бо мутахассисони касбӣ вохӯрӣ баргузор гардид. Дар вохӯрӣ раёсати донишгоҳ, намояндагони сарраёсати маорифи шаҳри Душанбе, мудирони шуъбаҳои маорифи ноҳияҳои пойтахт, директорони литсей, гимназия ва мактабҳо иштирок карданд.

Вохӯриро муовини якум, муовини ректор оид ба корҳои таълимӣ Айнуллозода Наҳтулло оғоз намуда, меҳмононро ба донишгоҳ хайрамақдам гуфт ва зимни суханронии худ иброз дошт, ки ҳамкории донишгоҳ бо Сарраёсати маориф ва шуъбаҳои маорифи шаҳр хуб ба роҳ монда шуда, айни ҳол дар асоси шартномаи ҳамкорӣ дар 35 мактаб донишҷӯёни донишгоҳ ба таҷрибаомӯзӣ машғуланд.

ОҒОЗИ ДАВРИ ДУЮМИ ДОНИШГОҲИИ ОЗМУНИ ““ТОҶИКОН”-ОИНАИ ТАЪРИХИ МИЛЛАТ”

Дар таърихи 17 феврали соли 2023 даври дуюми донишгоҳии озмуни ““Тоҷикон”-оинаи таърихи миллат” шуруъ шуд. Ҳайати ҳакамон таҳти роҳбарии муовини ректор оид ба корҳои илмӣ, профессор Дониёр Сангинзод якчанд довталабонеро, ки дар даври аввал  ғолиб омода буданд, мавриди суолу пурсиш қарор доданд. Зимнан, профессор Дониёр Сангинзод иброз дошт, ки озмуни мазкур бо ташаббус ва сарпарастии Президенти Ҷумҳурии Тоҷикистон муҳтарам Эмомалӣ Раҳмон ба ифтихори 115-солагии академик Бобоҷон Ғафуров баргузор гашта истодааст ва ҳадафи он арҷгузорӣ ба таърихи пурифтихори миллати тоҷик, омӯзиши амиқу ҳамаҷонибаи корномаҳои шоистаи ниёгони халқамон дар тӯли таърих, тақвияти ҳисси худогоҳӣ ва худшиносии миллӣ, эҳёи ҳофизаи таърихӣ мебошад.

МАСОИЛИ МУБРАМИ ЗАБОНШИНОСӢ ВА ТАҲЛИЛИ МУҚОИСАВӢ-ТИПОЛОГӢ

Дар таърихи 15 феврали соли 2023 бо ибтикори раёсати донишгоҳ дар ҳамбастагӣ бо факултети забон ва адабиёти рус таҳти унвони “Масоили мубрами забоншиносӣ ва таҳлили муқоисавӣ-типологӣ” конференсияи байналмилалии илмӣ-амалӣ баргузор карда шуд. Дар ҷаласаи ифтитоҳии конференсия муовини ректор оид ба корҳои илмӣ, профессор Сангинзод Д.Ш., профессори Донишгоҳи славянии Росияву Тоҷикистон Гусейнова Т.В., профессори кафедраи адабиёти рус ва ҷаҳон Нозимов А.А., профессори Донишгоҳи давлатии Тирмиз Бакиров П.У. ва дотсенти Донишгоҳи давлатии Тирмиз Панҷиев Н.П. ширкат намуданд. Конференсияро декани факултет Исломова Ҷ. ҳусни ифтитоҳ бахшид. Сипас, профессор Сангинзод Д.Ш. сухани ифтитоҳии ректори донишгоҳ, профессор Аҳлиддин Ибодуллозодаро ба самъи ҳозирин расонд, ки дар он аз ҷумла омадааст: “Дар шароити ҳамкориҳои мустаҳками байналмилалӣ талабот мутахассисоне, ки забонҳои русиву англисиро хуб баладанд. Аз ин рӯ зарурат пеш омадааст, ки шаклу методҳои тадриси забонҳои русӣ ва англисӣ боз ҳам мукаммалтар карда шаванд.”